საქართველო ევროპაში პატიმრების ყველაზე მაღალი მაჩვენებლით გამოირჩევა. ყოველწლიურ ანგარიშს ევროპის საბჭო აქვეყნებს.

დოკუმენტში 2015 წლის მონაცემებია ასახული, რომლის თანახმადაც, საქართველო ფიგურირებს ასევე იმ ქვეყანების სიაში, სადაც ყველაზე მაღალია თავისუფლების აღკვეთის პრაქტიკა.

კვლევის თანახმად, 2015 წელს ევროპის პენიტენციურ სისტემაში პატიმართა რიცხვი 6.8 პროცენტით შემცირდა, თუმცა 15 ქვეყანაში მნიშვნელოვან პრობლემად კვლავ რჩება გადავსებული საპატიმროები.

ანგარიშში მოყვანილი მონაცემები ცხადყოფს, რომ ყოველი მეხუთე პატიმარი ნარკოტიკულ დანაშაულთან დაკავშირებით იხდის სასჯელს. თუმცა საქართველოში, აზერბაიჯანში, რუსეთში, კვიპროსში, მონტენეგროსა და ლუქსემბურგში ეს მაჩვენებელი ბევრად მაღალია და 25 პროცენტს აღემატება.

დანაშაულის სტატისტიკაში მეორე ადგილზე ქურდობა, მესამეზე კი მკვლელობაა მოხსენიებული. საქართველოში ქალი პატიმრების წილი 3.1. პროცენტია, რაც მნიშვნელოვნად დაბალია ევროპის საბჭოს ქვეყნების საშუალო მაჩვენებელზე.

ასევე, საქართველოში არ არის გადატვირთული სასჯელაღსრულების დაწესებულები. თითოეულ პატიმარზე დღიურად საშუალოდ 6 ევრომდე იხარჯება. ეს ყველაზე დაბალი მაჩვენებელია კვლევაში მონაწილე ქვეყნებს შორის.

ევროპის მასშტაბით, სხვა პენიტენციურ სისტემებში საშუალო მაჩვენებელი თითოეულ პატიმარზე 52 ევროს შეადგენს.