ევროპის საბჭოსა და იურიდიულ საკითხთა კომიტეტის ორგანიზებით, სასტუმრო „რიქსოს ბორჯომში“, საერთაშორისო კონფერენცია „საქართველოს პარლამენტის როლი ადამიანის უფლებათა ევროპული კონვენციის სტანდარტების იმპლემენტაცია“ მიმდინარეობს.
როგორც „მოამბის“ ჟურნალისტი ადგილიდან იუწყება, საერთაშორისო კონფერენცია იურიდიულ საკითხთა კომიტეტის თავმჯდომარემ და ევროპის საბჭოს საპარლამენტო ასამბლეის წევრმა ეკა ბესელიამ გახსნა. ღონისძიების მონაწილეებს მისასალმებელი სიტყვით საქართველოს საკონსტიტუციო სასამართლოს თავმჯდომარე ზაზა თავაძე, ადამიანის უფლებათა ევროპული სასამართლოს მოსამართლეთა არჩევის კომიტეტის თავმჯდომარე, ლატვიის პარლამენტის წევრი ბორის სილევიჩი და ევროპის საბჭოს თბილისის ოფისის წარმომადგენელი ქრისტიან ურსე მიმართავენ.
საქართველოს პარლამენტის თავმჯდომარის პირველი მოადგილე, თამარ ჩუგოშვილი კონფერენციის სესიას -„ეროვნული პარლამენტის როლი ადამიანის უფლებათა ევროპული კონვენციის იმპლემენტაცია“ უხელმძღვანელებს.
სესიის ფარგლებში გამართულ პანელში, იურიდიულ საკითხთა კომიტეტის თავმჯდომარე ეკა ბესელია კონფერენციის მონაწილეებს საქართველოს პარლამენტის რეფორმას გააცნობს, რომელიც ადამიანის უფლებათა ევროპული სასამართლოს სტანდარტებისა და აღსრულების ეფექტური ზედამხედველობის მექანიზმების ჩამოყალიბების საკითხებს მოიცავს.
საერთაშორისო კონფერენციის მუშაობაში მონაწილეობენ საქართველოს პარლამენტის წევრები, უზენაესი სასამართლოს თავმჯდომარე ნინო გვენეტაძე და ექსპერტები. კონფერენციის მონაწილეები ადამიანის უფლებათა ევროპული კონვენციისა და მისი იმპლემენტაციის საკითხში საქართველოს პარლამენტის როლზე იმსჯელებენ.