სერჟანტთა მომზადების ცენტრში ევროპული არჩევანის შესახებ შეხვედრა გაიმართა
„ჩვენი ევროპული არჩევანი: ევროპული ღირებულებები, ევროატლანტიკური ინტეგრაცია“ - ამ სახელწოდების ინფორმაციულ-საგანმანათლებლო შეხვედრა გაიმართა დღეს გიორგი ანწუხელიძის სახელობის სერჟანტთა მომზადების ცენტრში.
ევროპული არჩევანის შესახებ ინფორმაციულ-საგანმანათლებლო შეხვედრა გაიმართა იმ სერჟანტებისთვის, რომლებიც სამეთაურო-საშტაბო (უფროსი სერჟანტის) კურსში მონაწილეობენ. კურსის ფარგლებში, მსმენელები სამხედრო ტაქტიკის, საბრძოლო მომზადების, გადაწყვეტილების მიღების, საშტაბო საქმიანობის შესწავლის პარალელურად, ევროატლანტიკური ორგანიზაციების საქმიანობას, ევროპულ ღირებულებებსა და ინტეგრაციის პროცესს გაეცნენ.
ნატოსა და ევროკავშირის შესახებ საინფორმაციო ცენტრის მიერ ორგანიზებული ღონისძიება სერჟანტთა მომზადების ცენტრის ხელმძღვანელმა, ვიცე-პოლკოვნიკმა რომან ქავთარაძემ გახსნა. მან შეიარაღებული ძალების წარმომადგენელთათვის მსგავსი ღონისძიებების მნიშვნელობაზე გაამახვილა ყურადღება. სიტყვით გამომსვლელებს შორის იყვნენ გენერალური შტაბის J5 სტრატეგიული დაგეგმვის დეპარტამენტის სამხედრო პოლიტიკისა და რეფორმების სამმართველოს უფროსი, ვიცე-პოლკოვნიკი გოჩა ტალახაძე, „საინფორმაციო ცენტრი ნატოსა და ევროკავშირის შესახებ“-ის დირექტორი ნინო ბოლქვაძე და სხვა მოწვეული სტუმრები.
საუბრის ძირითად თემებს შორის იყო თავდაცვის რეფორები, კრიზისების მართვა, ტერორიზმი, რეგიონული უსაფრთხოება, ნატო-საქართველოს ურთიერთობების პერსპექტივები, კიბერუსაფრთხოების მნიშვნელობა და უვიზო მიმოსვლა.
შეხვედრა დისკუსიის რეჟიმში წარიმართა. მოწვეულმა სტუმრებმა სერჟანტების მიერ დასმულ შეკითხვებსაც უპასუხეს.
სამეთაურო-საშტაბო კურსი 19 კვირიანია და 27 აპრილს დასრულდება.