საკონსტიტუციო კომისიის გადაწყვეტილებას, პრეზიდენტის უფლებების სავარაუდო შეზღუდვასთან დაკავშირებით, ფიქრია ჩიხრაძე გამოეხმაურა.

პრეზიდენტის მრჩეველი ამბობს, რომ ინიციატივა, რომლის მიხედვითაც, საქართველოს პრეზიდენტს უზენაესი სასამართლოს მოსამართლეობის კანდიდატის წარდგენის უფლება ჩამოერთმევა, საბოლოოდ გადაწყვეტილი არ არის.

მისი თქმით, ესაა მმართველი ძალის პოზიცია და ისურვებდა, რომ მეტი გარანტიები შექმნილიყო სასამართლოების დამოუკიდებლობისთვის.

საკითხზე საკონსტიტუციო კომისიამ გუშინ იმსჯელა. კონსტიტუციონალისტ ვახუშტი მენაბდის განმარტებით, ვენეციის კომისიის რეკომენდაციით, კანდიდატების შერჩევის პროცესში უნდა ჩართულიყო იუსტიციის უმაღლესი საბჭო.

მისივე თქმით, შეხვედრაზე გამოითქვა მოსაზრება, წარდგენის უფლება პრეზიდენტისთვისაც შეენარჩუნებინათ. თუმცა ამ წინადადებას უმრავლესობამ მხარი არ დაუჭირა.