თბილისში, „მარჯანიშვილის“ მეტროსთან გარემოვაჭრეების დახლები დილით აიღეს.
როგორც მოვაჭრეები „მოამბესთან“ საუბარისას აცხადებენ, ისინი სავაჭრო დახლების აღების შესახებ წინასწარ ინფორმირებულები არ ყოფილან.
მათივე თქმით, დილით ადგილზე მოსულებს დახლები უკვე აღებული დახვდათ.
გარემოვაჭრეების თქმით, ისინი ალტერნატიულ შეთავაზებას, იმუშაონ რომელიმე სავაჭრო ობიექტზე, არ დათანხმდებიან.
მათივე განცხადებით, ყველას ბანკის ვალი აქვს და მათი მცირე პროდუქციით, ისინი სხვა ადგილას ვაჭრობას და ქირის გადახდას ვერ შეძლებენ.
ადგილზე თბილისის მერიის წარმომადგენლები, ასევე სამართალდამცველები იმყოფებიან.
ჩუღურეთის რაიონის გამგებლის ზურაბ ჩიკვილაძის განცხადებით, არსებობს სპეციალური სავაჭრო ობიექტები, სადაც გარემოვაჭრეებს შეღავათიან პირობებს სთავაზობენ.
„ადგილი უნდა გასუფთავებულიყო, რადგან მთელი ეს ტერიტორია ბაზრად იყო ქცეული. არსებობს ვაჭრობისთვის სპეციალური ობიექტები, სადაც გარემოვაჭრეებს ექვსი თვის განმავლობაში ვთავაზობთ შეღავათიან პირობებს“,- განაცხადა ჩუღურეთის რაიონის გამგებელმა.