7 მაისს საქართველო კვალვ მსოფლიორბენას შეუერთდება. ყველაზე მასშტაბური საქველმოქმედო ღონისძიება საქართველოში უკვე მეოთხედ ჩატარდება.
კახეთში გასამართ გარბენში მონაწილეობის მისაღებად პირველი სპორტისა და ახალგაზრდობის საქმეთა მინისტრი ტარიელ ხეჩიკაშვილი დარეგისტრირდა.
გარბენში მინისტრთან ერთად რეგისტრაცია ოლიმპიური თამაშების ვერცხლის პრიზიორმა ძიუდოისტმა ვარლამ ლიპარტელიანმაც გაიარა.
მსოფლიო რბენა სპორტისა და ახალგაზრდობის სამინისტროსა და ფედერაციის - სპორტი ყველასათვის მხარდაჭერით ტარდება.
საქართველოში მონაწილეობის მსურველთა რეგისტრაცია დღეიდან დაიწყო და 4 მაისამდე გაგრძელდება. რეგისტრაციის ღირებულება 30 ლარს შეადგენს და ღონისძიებაში შემოსული თანხა კვლავ მოხმარდება სამედიცინო და კლინიკურ კვლევებს ზურგის ტვინის დაზიანების სამკურნალოდ.
მსოფლიო რბენა მსოფლიოს 25 ქვეყანაში 26 ლოკაციაზე ჩატარდება და მასში მონაწილეობას ასი ათასზე მეტი მორბენალი მიიღებს.