ზუგდიდის მოსახლეობა მომავალი წლიდან 24-საათიანი წყალმომარაგებით იქნება უზრუნველყოფილი. წყალმომარაგების ცენტრალიზებული სისტემის სამშენებლო სამუშაოები საქართველოს პრემიერმინისტრმა, გიორგი კვირიკაშვილმა რეგიონული განვითარებისა და ინფრასტრუტურის მინისტრ ზურაბ ალავიძესთან ერთად დაათვალიერა.

პროექტის ფარგლებში, შენდება წყალმომარაგების გამანაწილებელი ქსელი, სატუმბი სადგური და რეზერვუარები, ასევე - წყალმომარაგების მაგისტრალური მილსადენი.

სამუშაოების დასრულების შემდეგ, ადგილობრივ მოსახლეობას ათწლეულების განმავლობაში გადაუჭრელი პრობლემა მოუგვარდება და 24-საათიანი უწყვეტი წყალმომარაგება ექნება.

პროექტის ღირებულება 84 970 765 ლარია და მას აზიის განვითარების ბანკი აფინანსებს. სამუშაოები, რომელზეც 150 ადამიანია დასაქმებული, 2018 წელს დასრულდება.

ზუგდიდის შემდეგ, გიორგი კვირიკაშვილი ფოთში, მალთაყვის სანაპირო ზოლის რეაბილიტაციის პროცესს გაეცნო, სადაც უკვე მოწყობილია 3 კილომეტრამდე სიგრძის ახალი პლაჟი.

პროექტის თანახმად, მისი დასრულების შემდეგ მალთაყვას 7-კილომეტრიანი კეთილმოწყობილი პლაჟი ექნება.

სამეგრელოში ვიზიტის ფარგლებში მთავრობის მეთაური ზუგდიდის ტექნოპარკსაც ესტუმრა, სადაც ათასწლეულის ინოვაციის კონკურსში გამარჯვებულ ადგილობრივ მოსწავლეებს შეხვდა.

„იაზროვნეთ არასტანდარტულად, ყოველთვის იფიქრეთ, რომ არ აირჩიოთ ჩვეულებრივი გზა“, - ამ სიტყვებით მიმართა გიორგი კვირიკაშვილმა კონკურსში გამარჯვებულ ახალგაზრდა გამომგონებლებს.

პრემიერმა ახალგაზრდა გამომგონებლებს მიღწეული წარმატება მიულოცა და აღნიშნა, რომ ახალი ტექნოლოგიური პარკი ნიჭიერ ახალგაზრდებს, მსგავსი ინოვაციური იდეების განხორციელებაში დაეხმარება.