რუსთავის N21-ე საბავშვო ბაღში შეტანილ საქონლის ხორცში თეთრი პარკუჭები აღმოაჩინეს, ხორცს ფერი ჰქონდა შეცვლილი და ლორწოიანი იყო. ამის შესახებ „მოამბეს“ ბაღის გამგემ განუცხადა.

N21-ე საბავშვო ბაღში საეჭვო ხორცის აღმოჩენის შემდეგ, ხელმძღვანელობა რუსთავის ბაღების გაერთიანებას დაუკავშირდა. ბაღების გაერთიანების გადაწყვეტილებით, ხორცის პარტიის გამოყენება ყველა საბავშვო ბაღში აიკრძალა. ხორცი 20-ივე ბაღში დალუქულ მდგომარეობაში, მაცივარში ინახება.

საეჭვო ხორცის ნიმუშები შესამოწმებლად სურსათის უვნებლობის სამსახურის წარმომადგენლებმა აიღეს და ანალიზის პასუხი ერთი კვირიდან ერთ თვეში უნდა გახდეს ცნობილი.

როგორც ირკვევა, ტენდერში გამარჯვებულ კომპანია „ბადას“ რუსთავის 20 საბავშვო ბაღისათვის საჭირო 232 კგ. საქონლის ხორცი, ხელშეკრულების თანახმად, ობიექტებზე კვირაში ერთხელ შეაქვს.

როგორც „ბადაში“ აცხადებენ, ორი წელია, მსგავსი პრობლემა არ დაფიქსირებულა. კომპანია განმარტებას მოგვიანებით გააკეთებს.