სამაუწყებლო კომპანია „რუსთავი 2“-ის გენერალური დირექტორის ნიკა გვარამიას განცხადებით, არხის თანამშრომლები ახალ შპს „რუსთავი 2-ის გუნდს“ დააფუძნებენ, რომელიც ტელევიზიის 91%-ის მფლობელებისგან ლევან და გია ყარამანიშვილებისგან აქციათა საკონტროლო პაკეტს მიიღებს.

შეთავაზებული 51%-ის მიღებაზე თანხმობის შესახებ ტელევიზიის გენდირექტორმა ნიკა გვარამიამ „კურიერის“ ეთერში განაცხადა. მან ძმებ ყარამანიშვილების გადაწყვეტილებას უპრეცედენტო უწოდა.

ნიკა გვარამიას თქმით, გუნდი კონსულტაციების რეჟიმზე გადასვლისთვის მზად არის.

ნიკა გვარამიას განცხადებით, თუ ვინ იქნება ახალ შპს-ში, ამის შესახებ დღეს, 19:00 საათისთვის დაგეგმილ შეკრებაზე იმსჯელებენ.

გვარამიას განმარტებით, ახალ შპს-ში გაერთიანებული ადამიანების ინტერესი დივიდენდების მიღება არ იქნება.

„უძირო ხრამია „რუსთავი 2“ და არხის მოგება მის გადაიარაღებას ხმარდება“ - განაცხადა გვარამიამ.

მანვე აღნიშნა, რომ ძმებ ყარამანიშვილების ნებართვის გარეშე, მათ ქონების გასხვისების უფლება არ ექნებათ.

ლევან და გია ყარამანიშვილებმა „რუსთავი 2“-ის აქციათა საკონტროლო პაკეტის, 51%-ის მფლობელი შპს ტელეკომპანია „საქართველოს“ აქციების საკონტროლო პაკეტის - 51% „რუსთავი 2“-ის თანამშრომლებისთვის გადაცემის მზადყოფნის შესახებ გუშინ განაცხადეს.