ტვერის რაიონულმა სასამართლომ რუს პოლიტიკოსს, ალექსეი ნავალნის არასანქცირებული აქციის ორგანიზებისთვის 20 000 რუბლის ოდენობით ჯარიმა დაუწესა. ასევე, ნავალნი ბრალდებულად ცნეს სამართალდამცველი ორგანოების მიმართ დაუმორჩილებლობაში.
ალექსეი ნავალნის ფონდის ორგანიზებით, რომელიც პრემიერ-მინისტრის ქონების შესახებ გამოძიებას ატარებდა, კვირას, რუსეთის დიდ ქალაქებში საპროტესტო აქცია გაიმართა.
სამართალდამცველებმა 900-მდე ადამიანი დააკავეს, აქედან 500-მხოლოდ მოსკოვში. დაკავებულთა შორის ალექსეი ნავალნის პარტიის მოსკოვის ოფისის წარმომადგენელიცაა, რომელსაც დაკავების დროს სამართალდამცველმა თავში ბლაგვი საგანი ჩაარტყა.
ნიკოლაი ლიასკინს ტვინის შერყევა აქვს და ამჟამად მკურნალობას ბადრაგის მეთვალყურეობის ქვეშ კლინიკაში გადის.
ალექსეი ნავალნის დაკავების შემდეგ, პოლიცია ფონდის ოფისშიც შეიჭრა და ყველა თანამშრომელი დააკავა.
ამერიკის შეერთებული შტატების სახელმწიფო დეპარტამენტი საპროტესტო აქციების დარბევას აკრიტიკებს და მომხდარს დემოკრატიული ფასეულობების შეურაცხყოფად აფასებს.