საათები რჩება ისტორიული გადაწყვეტილების ძალაში შესვლამდე.
ხვალიდან, საქართველოს მოქალაქეებისთვის შენგენის საზღვრები ვიზების გარეშე გაიხსნება.
თბილისის დროით დილის სამ საათზე ევროპასთან უვიზო მიმოსვლა ამოქმედდება. ეს არის ხუთწლიანი პროცესის წარმატებული ფინალი-ევროკომისიის დადებითი დასკვნის, ევროპული საბჭოს თანხმობის და ევროპარლამენტის 553-ი დეპუტატის მხარდაჭერის შემდეგ, შენგენის ზონის ქვეყნებთან სავიზო რეჟიმი უქმდება.
2017 წლის 28 მარტი საქართველოსთვის გამორჩეული დღეა. ისტორიული თარიღის მოახლოებას, თბილისი სამდღიანი საზეიმო ღონისძიებებით აღნიშნავს.
აღმაშენებლის გამზირის შემდეგ, ხალხმრავლობაა ევროპის მოედანზე, სადაც ერთ საათში ვიზალიბერალიზაციისადმი მიძღვნილი გალა-კონცერტი დაიწყება.
საღამოს ევროკავშირის ჰიმნი და ანსამბლი „ერისიონი” გახსნის. სცენაზე გამოვლენ ესტრადის შემსრულებლებიც.
მარიამ შალიკაშვილი ისაუბრებს თემის დეტალებით.