თბილისის საქალაქო სასამართლო დეკანოზ გიორგი მამალაძის აღკვეთის ღონისძიების მიზანშეწონილობის საკითხზე დღეს იმსაჯელებს.

პროცესი სასამართლოში 17.00 საათისთვის არის ჩანიშნული.

როგორც საზოგადოებრივ მაუწყებელს გიორგი მამალაძის ადვოკატმა, მიხეილ რამიშვილმა განუცხადა, როდესაც სასამართლო აკმაყოფილებს მოთხოვნას წინასასამართლო სხდომის გადადების შესახებ, პროცედურულად სასამართლო ვალდებულია, იმსჯელოს აღკვეთის ღონისძიების, კერძოდ კი, პატიმრობის მიზანშეწონილობაზე.

საქართველოს მთავარმა პროკურატურამ დეკანოზ გიორგი მამალაძის წინასასამართლო სხდომის ერთი თვით გადავადება მოითხოვა.

პროკურატურის ეს შუამდგომლობა სასამართლომ დააკმაყოფილა და პროცესი 5 მაისამდე გადადო.

როგორც პროკურორმა ჯარჯი წიკლაურმა განმარტა, ამის მიზეზი ის არის, რომ შესაბამისი ექსპერტიზები, დიდი მოცულობისა და სირთულის გამო, ამ ეტაპზე არ არის დასრულებული.
„საქართველოს მთავარმა პროკურატურამ მიიღო გადაწყვეტილება ბრალდებულ გიორგი მამალაძის საქმეზე, წინასასამართლო სხდომის ვადის გაგრძელების თაობაზე.
მოცემულ საქმეზე ინტენსიურად გრძელდება გამოძიება, დანიშნულია სხვადასხვა სახის ექსპერტიზები, მათ შორის ბიოლოგიური, სამედიცინო, ქიმიური, ტოქსიკოლოგიური, ფონოსკოპიური, ჰაბიტოსკოპიური და კომპიუტერული ექსპერტიზები, რომლებიც დიდი მოცულობისა და სირთულის გამო, ამ ეტაპზე, არ არის დასრულებული", - აცხადებს წიკლაური.
მისივე თქმით, ექსპერტიზების დასრულების შემდეგ, საქმეზე ჩასატარებელია არაერთი შემხვედრი და აუცილებელი საგამოძიებო მოქმედება, ასევე, დასაკითხია არაერთი მოწმე.

ე.წ. ციანიდის საქმესთან დაკავშირებით, დეკანოზი გიორგი მამალაძე 13 თებერვალს დააკავეს. მას აღკვეთის ღონისძიების სახით, პატიმრობა აქვს შეფარდებული.