უფასო სახელმძღვანელოების პროგრამა გაგრძელდება. განათლების და მეცნიერების მინისტრის მოადგილის თეიმურაზ მურღულიას განცხადებით, გამომცემლების მოთხოვნა, თავად დაბეჭდონ სახელმძღვანელოები და შემდეგ სარეალიზაციო ქსელში შეიტანონ, არ დაკმაყოფილდება. რადგან ფიქრობენ, რომ ეს კონკურენციას შეზღუდავს.
სამინისტროსა და გამომცემლებს შორის უთანხმოებაა ტენდერის პირობებზეც. მურღულიას თქმით, სამინისტროსთვის გაუგებარია, როგორ უნდა მოხდეს ინტელექტუალური საკუთრების ტენდერის გზით შეძენა.
გამომცემლობები კი სატენდერო პირობებში რისკებს ხედავენ და ამბობენ, რომ თუკი მათ მოთხოვნებს სამინისტრო არ გაითვალისწინებს, ტენდერში მონაწილეობაზე უარს იტყვიან. ისინი 22 აპრილს გეგმავენ გამომცემელთა მსოფლიო ასოციაციის წარმომადგენლებთან შეხვედრას და პრობლემების გაცნობას.