„თეთრი ხმაურის მოძრაობა" ვიდეომასალას აქვეყნებს, რომელიც 23 მარტს შოთა პაკელიანის დაკავების შემდეგ ისანი-სამგორის პოლიციაშია გადაღებული.

დღეს გამართულ პრესკონფერენციაზე დაკავებულის ოჯახის წევრებმა თქვეს, რომ ვიდეოში ისმის შოთა პაკელიანის ხმა და ის დახმარებას ითხოვს.

მათი თქმით, პოლიციელები მისგან წამებით ცდილობდნენ აღიარებითი ჩვენების მიღებას და დაზიანებები იმდენად ძლიერი იყო, რომ 26 წლის ახალგაზრდა საავადმყოფოში ოთხი დღის განმავლობაში უგონო მდგომარეობაში იმყოფებოდა.

საქმით უკვე დაინტერესდა სახალხო დამცველი. ბრალდებების საპასუხოდ შსს აცხადებს, რომ დაზიანებები ბრალდებულმა დაკავების დროს მიიღო, როცა ის, ოფიციალური ვერსიით, გაქცევას ცდილობდა და წაიქცა.

როგორც შსს-ს განცხადებაშია აღნიშნული, პირადი ჩხრეკისას ნარკოტიკული საშუალება ამოიღეს. დაკავებულმა კი საავადმყოფოში მორიგე ექიმს განუცხადა, რომ მას ე.წ. „ბიო“ ჰქონდა გადაყლაპული. ანალოგიური დანაშაულისთვის შოთა პაკელიანი 2016 წელსაც იყო დაკავებული.