გონიოში მცხოვრები 271 ოჯახი, რომელთაც 2007 წელს პრეზიდენტ სააკაშვილის ბრძანებით, მიწის ნაკვეთები საკუთრებაში გადაეცათ, სამი წლის შემდეგ კი უკანვე ჩამოერთვათ, სასამართლო დავას განაგრძობენ.
როგორც „მოამბის“ ჟურნალისტი ადგილიდან იუწყება, ბათუმის საქალაქო სასამართლომ დღეს 4 ოჯახის სარჩელი დააკმაყოფილა და უკანონოდ სცნო, ერთი წლის წინ, ბათუმის საკრებულოს მიწის საკუთრების აღიარების კომისიის გადაწყვეტილება, რომლის მიხედვითაც ოჯახების ნაწილს საკუთრების დაბრუნებაზე უარი ყოველგვარი განმარტების გარეშე უთხრეს.
საკრებულომ საკითხის განხილვა თავიდან უნდა დაიწყოს. ოჯახების ინტერესებს „საერთაშორისო გამჭვირვალობა საქართველო“ იცავს. ორგანიზაციის იურისტის განმარტებით, დღევანდელი გადაწყვეტილება მნიშვნელოვანი და პრეცედენტულია, რადგან სასამართლომ გადაწყვეტილება ერთ თვეში კიდევ გონიოში მცხოვრები სამოცი ოჯახის ანალოგიურ სარჩელზე უნდა გამოიტანოს.