იუსტიციის უმაღლესი საბჭოს წევრი ვახტანგ მჭედლიშვილი ითხოვს, მოსამართლეთა შერჩევაზე საბოლოო გადაწყვეტილება საბჭომ ახალი რეგულაციების გათვალისწინებით მიიღოს, ამის შესახებ „მოამბის“ ჟურნალისტი ადგილიდან იუწყება.
მჭედლიშვილმა დღევანდელ სხდომაზე საბჭოს წევრებს მიმართა და მოუწოდა საერთო სასამართლოების შესახებ კანონში იმ ნორმების შეცვლას დაელოდონ, რომელზეც საკონსტიტუციო სასამართლომ გადაწყვეტილება მიიღო.
საუბარია გადაწყვეტილებაზე, რომლის მიხედვითაც კონკურსის შედეგად შერჩეულ მოსამართლეებზე, უვადოდ დანიშვნის დროს, სამწლიანი გამოსაცდელი ვადა არ გავრცელდება იმ შემთხვევაში, თუ მათ მოსამართლედ მუშაობის რამდენიმეწლიანი გამოცდილება აქვს. აღნიშნული ნორმის შეცვლისთვის საკონსტიტუციო სასამართლომ პარლამენტს ვადა პირველ ივლისამდე მისცა.
სწორედ ამ გადაწყვეტილების გათვალისწინებას ითხოვდა მჭედლიშვილი საბჭოს დღევანდელ სხდომაზე და წევრებს მოუწოდებდა, საბოლოო გადაწყვეტილების მიღებამდე, ახალი ნორმის ამოქმედებას დაელოდონ, მანამდე კი კონკურსზე მუშაობა გაგრძელდეს და, პარალელურად, პარლამენტთან ერთად, ახალი რეგულაციები შეიმუშაონ.
როგორც „მოამბის“ ჟურნალისტი იუწყება, მჭედლიშვილის წინადადება საბჭოს არც ერთმა წევრმა არ გაიზიარა. საბჭოს წევრებმა რამდენიმე არგუმენტი დაასახელეს. საბჭოს წევრებმა განაცხადეს, რომ პირველ ივლისამდე დღეს არსებული რეგულაციები მოქმედებს და სწორედ ივლისში უნდა მოხდეს ამ ნორმის შეცვლა, მანამდე კი არსებული კანონით იხელმძღვანელებენ.
ასევე საბჭოს წევრთა ნაწილმა განაცხადა, რომ სასამართლოებში მოსამართლეთა სიმცირისა და საქმეების სიმრავლის გამო, კონკურსი უნდა ჩატარდეს არსებული ნორმით, ასევე იმის გათვალისწინებით, რომ საბჭოს წევრთა უმეტესობას ივნისში გასდის ვადა, ხოლო ახალი წევრების დანიშვნამდე და მათი უფლებამოსილების ამოქმედებამდე მოსამართლეთა შესარჩევი კონკურსის პროცესი შესაძლოა გაჭიანურდეს.
მოსამართლეთა შესარჩევი კონკურსის პირველი ტური უკვე ჩატარდა და საბჭოს წევრები გასაუბრების ეტაპს 24 აპრილს დაიწყებენ. მეორე ტურში გადასულია 105 კანდიდატი, ხოლო რამდენიმეს დოკუმენტაციის გამოსასწორებლად გარკვეული ვადა მიეცათ.