საქართველომ 2018 წლის ზამთრის ოლიმპიურ თამაშებზე პირველი ლიცენზია მოიპოვა.

ქართველმა მოციგურავე მორის ყვითელაშვილმა, ჰელსინკიში დასრულებულ მსოფლიო ჩემპიონატზე 239, 24 ქულა მიიღო და 24 უძლიერეს მონაწილეს შორის, მეცამეტე ადგილი დაიკავა.

22 წლის სპორტსმენმა მსოფლიო ჩემპიონატზე პირველად იასპარეზა და ევროპის ჩემპიონატზე ნაჩვენები პირადი შედეგი გააუმჯობესა.

მორის ყვითელაშვილი საქართველოს სახელით უკვე ერთი წელია ასპარეზობს, საერთაშორისო ტურნირებისთვის კი მოსკოვში ცნობილი მწვრთნელი, ეთერ თუთბერიძე ავარჯიშებს.

2018 წლის ზამთრის ოლიმპიური თამაშები სამხრეთ კორეის ქალაქ პიონგჩანგში, 9 თებერვლიდან 25 თებერვლის ჩათვლით გაიმართება.