„პარტიზანული მებაღეობის“ წევრებმა ქავთარაძის ქუჩაზე ხეების მოჭრა გააპროტესტეს. ორგანიზაციის წარმომადგენლების ინფორმაციით, ადგილზე საცხოვრებელი სახლის მშენებლობა იგეგმება.

ნატა ფერაძის განცხადებით, შეტყობინება მათ ადგილობრივი მცხოვრებისგან მიიღეს.ადგილზე მისულებმა კი, თავად ნახეს, როგორ გაიტანეს ტერიტორიიდან მოჭრილი ხეები.

მოძრაობის წარმომადგენლებმა ინფორმაცია მერიის ზედამხედველობის სამსახურში გადაამოწმეს და აღმოჩნდა, რომ ნებართვა მხოლოდ ოთხი წიწვოვანი ხის მოჭრაზე იყო გაცემული, თუმცა მათი თქმით, მეტი ხეა მოჭრილი.

ადგილზე გამოძახებულმა ზედამხედველობის სამსახურის წარმომადგენლებმა განაცხადეს, რომ მათ ოთხ ძირზე მეტი ხის მოჭრის ფაქტი ვერ დააფიქსირეს.