საქართველოს ჭიდაობის ფედერაცია ჩვენი ქვეყნის ნაკრების ოკუპირებულ ყირიმში მომზადების ფაქტს უარყოფს. ამის შესახებ ფედერაციის მიერ გავრცელებულ განცხადებაშია აღნიშნული.
„საზოგადოებრივი ინტერესიდან გამომდინარე, ჭიდაობის ეროვნული ფედერაცია განმარტავს, რომ მსოფლიო ჩემპიონატისთვის საქართველოს ნაკრები მომზადებას ალუშტას ბაზაზე არ გადის. ეს იყო მექანიკური შეცდომა, რომელიც საუბრისას იქნა დაშვებული. ეროვნული ნაკრების ნაწილი ბორჯომში იმყოფება, ნაწილი კი, საქართველოს ფარგლებს გარეთ.
ბერნულ-რომაული სტილით მოჭიდავეთა უფროსი ასაკის ნაკრები რამდენიმე დღეა უკვე ევროპის ჩემპიონატისთვის, ადლერში შეკრებაზე იმყოფება, ხოლო დღეს, გუნდს 23-მდე ასაკის წევრებიც შეუერთდებიან, რომლებიც მსოფლიო ჩემპიონატისთვის დაიწყებენ მზადებას.
თავისუფალი და ბერძნულ-რომაული სტილით მოჭიდავეთა ნაკრებმა უკვე გაიარა მზადება სომხეთის ქალაქ წაღკაძორში, რის შემდეგაც ჩვენს ქვეყანას ევროპის ჩემპიონატზე გუნდური პირველი ადგილი და 11 მედალი მოუტანა“, - აღნიშნულია განცხადებაში.
ჭიდაობის ფედერაციის პრეზიდენტმა გეგა გეგეშიძემ სატელევიზიო ინტერვიუში განაცხადა, რომ საქართველოს ნაკრები ალუშტაში ემზადება, რომელიც ოკუპირებულ ყირიმში მდებარეობს.