საზოგადოებრივი მაუწყებლის საერთო სიგნალით სარგებლობის ახალი წესი ამოქმედდება. ყველაფერი რჩება უცვლელად, ანუ პირდაპირ ტრანსლაციაზე წვდომა ისევ ყველა კერძო ტელეკომპანიას უსასყიდლოდ ექნება.
სიახლეა მხოლოდ ის, რომ ტელევიზიები ვალდებულები ხდებიან, სიგნალის გავრცელების დროს, მაუწყებლის ლოგო გამოიყენონ. ეს არის საერთაშორისო სტანდარტი, რომლის დაცვა მომავალში სხვა არხებს მოუწევთ.
თუმცა საკითხი უკვე გახდა უკმაყოფილების მიზეზი რამდენიმე დეპუტატის მხრიდან. ოპოზიციის ნაწილი გადაწყვეტილებას კერძო არხებისთვის დაწესებულ შეზღუდვად აფასებს და აქცენტს საპარლამენტო სხდომების ტრანსლირებაზე აკეთებს.
არასწორად გავრცელებული ინფორმაცია: ასეთია მაუწყებლის პასუხი. განმარტების მიხედვით, საზოგადოებრივი მაუწყებლის მენეჯმენტი ხაზს უსვამს, რომ საერთო სიგნალის უზრუნველყოფის დროს, ტელევიზია ადამიანურთან ერთად, ტექნიკურ და ფინანსურ რესურსებს ხარჯავს.