პრემიერლიგის მსგავსად, გუშინ, 27-ე ტურის რამდენიმე შეხვედრა გერმანიის ბუნდესლიგაშიც ჩატარდა.

მოულოდნელი მარცხი განიცადა მოქმედმა ჩემპიონმა და გათამაშების ლიდერმა მიუნხენის ბაიერნმა.

რეკორდმაისტერმა სტუმრად ჰოფენაიმთან წააგო. შეხვედრის ერთადერთი გოლი მასპინძლთა ხორვატმა თავდამსხმელმა, ანდრეი კრამარიჩმა გაიტანა.

ჰოფენჰაიმი 51 ქულით ჩემპიონატში მესამე ადგილზეა. ბაიერნი კი პირველ საფეხურზეა და დიდი სხვაობით უსწრებს მეორეადგილოსან ლაიპციგს.

დამაჯერებელ გამარჯვებას მიაღწია დორტმუნდის ბორუსიამ. ტომას ტუხელის გუნდმა საკუთარ სიგნალ იდუნა პარკზე ჰამბურგი მშრალი ანგარიშით 3-0 დაამარცხა.

ბორუსიამ ტაიმი გონსალო კასტროს გოლით მოიგო. მასპინძლებმა მეორე ტაიმში კიდევ ორჯერ აიღეს მეტოქის კარი.

81-ე წუთზე სინჯი კაგავამ დაარტყა ზუსტად, ხოლო დამატებულ დროში, პიერ ემერიკ ობამეიანგმა თამაშს საბოლოო წერტილი დაუსვა.

დორტმუნდის ბორუსია 50 ქულით ბუნდესლიგაში მეოთხე ადგილზეა.