ცენტრ პოინტის გახმაურებული საქმის ერთ-ერთი ფიგურანტი თავისუფალია. გირაოს სანაცვლოდ გათავისუფლებული გურამ რჩეულიშვილი მთავარ ამოცანად, პატიმრობაში მყოფ ოჯახის წევრებთან საპროცესო შეთანხმების გაფორმებას და დაზარალებულების დაკმაყოფილებას აცხადებს.
ამ მიზნით, კომპანიის ერთ-ერთი დამფუძნებელი პროკურატურაში საგარანტიო საბუთების მიტანას აპირებს იმის დასტურად, რომ შეჩერებული მშენებლობები დასრულდება.
მენაშენეებს რჩეულიშვილების დაპირებების და მათ მიერ მოძიებული ინვესტორების აღარ სჯერათ. დაზარალებულები სასამართლოს დღევანდელი გადაწყვეტილებითაც უკმაყოფილოები არიან. საცხოვრებელ კომპლექს მაგნოლიას ეპიზოდში ბრალდებული გურამ რჩეულიშვილის წინასწარი პატიმრობის ვადა ექვს დღეში იწურებოდა, თუმცა საქმის განხილვა ჯერ ისევ არ არის დასრულებული. სწორედ ეს გარემოება გახდა პროკურატურის დღევანდელი შუამდგომლობის მიზეზი.