ფრაქცია „მოძრაობა თავისუფლებისთვის - რეგიონების“ თავმჯდომარის, გიორგი ღვინიაშვილის განცხადებით, ეკონომიკური ზრდის თვალსაზრისით ქვეყანა მნიშვნელოვნად შენელებულია. ამის შესახებ ღვინიაშვილმა პარლამენტში პრეზიდენტის გიორგი მარგველაშვილის გამოსვლის შემდეგ განაცხადა და პრეზიდენტს მიმართა, რომ მის ხელში არის მთავარი იარაღი, სიმართლის თქმა.
ღვინიაშვილის განცხადებით, „ქართული ოცნების“ ხელისუფლება არის უუნარო და არ აქვს გეგმა ეკონომიკური კრიზისიდან გამოსასვლელად.
„ნაცვლად იმისა რომ კლებულობდეს, ყოველდღიურად მატულობს სიღარიბე, სამუშაო ადგილები კი არ იქმნება არამედ იკარგება, საბანკო ვალის გადახდის დღე საქართველოში ყველა ოჯახს ეშინია, სოფლად დაპირებული განვითარებაც ზღაპარი აღმოჩნდა, ახალი ბაზრების აღმოჩენა კი არა ძველი კარგად ათვისებული ბაზრებიც იკარგება. მოდით ვკითხოთ გურჯაანელ გლეხს ხომ არ მიეხმარა ვინმე ახალი ბაზრების მოძიებაში თუ ძველი კარგად ათვისებული აზერბაიჯანული ბაზარიც ეკეტება მთავრობის უნიათობის გამო. ყველაფერი მცირდება და ეკონომიკური ზრდის თვალსაზრისით ქვეყანა მნიშვნელოვნად შენელებულია, ერთადერთი რაც იზრდება არის ბიუროკრატიული ხარჯები, ეს არის ჩინოვნიკების პრემიები და დანამატები და ეს არის პოლიტიკური თუ ნათესაური კავშირებით უსაშველოდ გაბერილი სსიპები და ააიპები.
მე მესმის რომ პრეზიდენტს არ აქვს რეალური ბერკეტები მთავრობის ზემოქმედებაზე, მაგრამ ბატონო პრეზიდენტო ხალხმა მოგცათ ხმა და თქვენს ხელში არის მთავარი იარაღი, სიმართლის თქმა. სიმართლეში უნდა ითქვას ის, რომ ქართული ოცნების ხელისუფლება არის უუნარო და არ აქვთ გეგმა ეკონომიკური კრიზისიდან გამოსასვლელად. მინისტრებს გონიათ რომ ხალხს ბღუჯებად აქვთ ფული, ამით მთავრობა კმაყოფილია და ყურს არ უგდებს საზოგადოებას“ - განაცხადა ღვინიაშვილმა.
მისივე თქმით, გაჭირვებიდან ამოსასვლელად აუცილებელია არა პრემიების, ბიუროკრატიული ხარჯების და დანამატების ზრდა, არამედ პენსიების, სოციალური დახმარების აღდგენა, ჯანდაცვის პროგრამაში მედიკამენტების ჩართვა, გადასახადების შემცირება.
„დღეს არის მე-5 წელი და სრულიად აშკარაა, რომ არცერთი დაპირება რომელიც გასცა ხელისუფლებამ არ შესრულებულა. აღარ ვსაუბრობ დემოკრატიის ხარისხზე: დასუსტებული საკონსტიტუციო სასამართლო, პოლიტიკური საერთო სასამართლოები და თითქმის მოშლილი ქვეყნის უსაფრთხოების სისტემა. ქვეყანას მართავს ადამიანი რომელიც არც პრეზიდენტია, არც აღმასრულებელი ხელისუფლების ნაწილი, მაგრამ ყველაფერი არის მის ხელში. ერთადერთი გამოსავალი ხელისუფლების შეცვლაა, რასაც ევროპული საქართველო გააკეთებს დემოკრატიული გზით“, - განაცხადა გიორგი ღვინიაშვილმა.