სამწუხაროდ, გაერთიანების და მიუკერძოებლობის სიმბოლოს მაგივრად, თქვენ იქეცით საზოგადოების ერთი ნაწილის პოზიციების გამხმოვანებლად და დღესაც ალბათ ვნახავთ, ერთი ფლანგის პოზიციას შორის მსგავსებას, - ამის შესახებ საქართველოს პარლამენტის დამოუკიდებელმა დეპუტატმა სალომე ზურაბიშვილმა პარლამენტის სხდომაზე განაცხადა, სადაც პრეზიდენტის ყოველწლიური მოხსენება შეაფასა.
როგორც სალომე ზურაბიშვილმა აღნიშნა, ხალხის მიერ არჩეული პრეზიდენტი საკუთარი, ძლიერი ლეგიტიმურობის მატარებელია და ამითი ის იმსახურებს სხვა ხარისხის ნდობას, შესაძლებლობა ეძლევა, რომ ქვეყნის შიგნით, თუ გარეთ ითამაშოს შემწყნარებლის და გამაერთიანებლის როლი.
„პატარა ქვეყნისთვის არცთუ უმნიშვნელოა, რომ საგარეო სფეროში პრემიერთან და საგარეო მინისტრთან ერთად საშუალება გქვონდეს, რომ ძლიერი მოთამაშე პრეზიდენტობის დონეზე გამოვიყვანოთ ასპარეზზე და ამითი გავზარდოთ ჩვენი ცნობადობა საზღვარგარეთ. სამწუხაროდ, ბატონო პრეზიდენტო, თქვენ ამ სიმბოლოს არ თუ ვერ ვერ გაუფრთხილდით ისე, როგორც საჭირო იქნებოდა, სამწუხაროდ ის მრავალთვიანი საგარეო წარმომადგენლობა მსოფლიო მოედანზე გადაქციეთ სამარცხვინო შეჯიბრად და ქიშპობის საგნად“, - აღნიშნა სალომე ზურაბიშვილმა.
მისი თქმით, საქართველოს პრეზიდენტი გაერთიანების და მოუკერძოებლობის სიმბოლოს მაგივრად, იქცა საზოგადოების ერთი ნაწილის პოზიციების გამხმოვანებლად. „დღესაც ალბათ ვნახავთ, ერთი ფლანგის პოზიციას შორის მსგავსებას.“
„თქვენ ვერ შეიგნეთ, რომ ყველა ქართველის პრეზიდენტის უნდა ყოფილიყავით. თქვენ გადახვედით სახელმწიფო მოღვაწეობიდან პოლიტიკურ არენაზე. სამწუხაროდ, თქვენ, როცა შეირგეთ ამ ადგილზე თქვენივე დანიშვნა, თქვენ მაშინვე კითხვის ქვეშ დააყენეთ პრეზიდენტის არჩევითობის პრინციპი. სამწუხაროდ, როცა შეწყალების დრო თქვენი ახლობლების მიმართ უფრო ლმობიერებას იჩენთ, ვიდრე უპატრონო მოქალაქეების მიმართ, თქვენივე მორალურ ავტორიტეტს აქვეითებთ. სამწუხაროდ, როცა ვეტოთი ხმალაობთ, იმის მაგივრად, რომ ეს ბერკეტი გამოიყენოთ მხოლოდ უკიდურეს შემთხვევაში, როცა ნამდვილად დემოკრატიული ან სახელმწიფოებრივი პრინციპი ირღვევა და საფრთხის ქვეშ დგება, იმის მაგივრად, რომ მიგეჩვიათ საზოგადოება აზრთა სხვაობას, ჯანმრთელ დისკუსიას და ურთიერთ აზრების პატივისცემას, ამის მაგივრად დაპირისპირების და დაძაბვის მაგალითს აძლევთ. ამით თქვენ გამაერთიანებელ და შემწყნარებელ როლს აკნინებთ“, - განაცხადა სალომე ზურაბიშვილმა.
მისივე თქმით, პრეზიდენტმა "ვერ შეიგნო", რომ მართლაც ყველა ქართველის პრეზიდენტი უნდა ყოფილიყო.
„დღემდე ველოდები თქვენს მიერ გამოთქმულ პოზიციას უცხოეთში მცხოვრები თანამემამულეთა მიმართ, მათთვის მოქალაქეობის ჩამორთმევას ადვილად შეეგუეთ და სააკაშვილის დაწესებულ მინიჭების პრაქტიკაც მოირგეთ და მადლობებსაც ღებულობთ. ამ დროს არ გიფიქრიათ, რომ ეს პრინციპი არის დისკრიმინაციული, არაევროპული, უკარგავს ჩვენ მოქალაქეებს სახელმწიფოსთან მჭიდრო ურთიერთცხოვრების სურვილს და ჩართულობის საშუალებას, უკარგავს აფხაზეთის და ცხივალის რეგიონს მაცხოვრებლებს, რომ დღეს ევროპის ვიზებით ისარგებლონ. ეს არის პატარა ქვეყნისთვის უგუნური და წიდნაუხედავი გულგრილობა. დღევანდელ სიტყვაში არა თუ მოქალაქეობის საკითხზე, რომელიც საკონსტიტუციო დისკუსიაში ერთ-ერთ მნიშვნელოვან ადგილს იკავებს და, რომელზედაც არ გიკითხავთ ქუთაისლების აზრი, არამედ საერთოდ არაფერი გითქვამთ უცხოეთში მყოფი თანამემამულეების ბედზე, რომლებიც ჩვენი ქვეყნის მოსახლეობსი ერთ მეოთხედს წარმოადგენენ“, - განაცხადა ზურაბიშვილმა.
დეპუტატის შეფასებით, გიორგი მარგველაშვილმა ოკუპირებული ტერიტორიების საკითხზე ახალი სიტყვა ვერ თქვა.
"შემოიფარგლეთ ლოზუნგით, როცა რაც დრო გადის ჩვენ საწინააღმდეგო გადის სიტუაცია და ამ საკითხს სჭირდება მეტი სიტყვა და სტრატეგიული ხედვა. ამ საკითხის მოგვარებაში გვჭირდება პრეზიდენტის მეტი ძალა და მეტი ერთობა“, - განაცხადა სალომე ზურაბიშვილმა.