მიხარია, რომ ეს დებატები შედგა, მიუხედავად იმისა, რომ ბევრი კრიტიკა მოვისმინე, - ამის შესახებ საქართველოს პრეზიდენტმა გიორგი მარგველაშვილმა პარლამენტში ყოველწლიური ანგარიშით გამოსვლის შემდეგ გამართული დებატების დასრულების შემდეგ განაცხადა.
„რაც შეეხება ჩვენს დებატებს, მინდა პირველ რიგში, მადლობა გითხრათ. საქართველოს პარლამენტში შედგა დებატები. ეს დებატები იყო ძალიან ფართო, მრავლისმომცველი. ნამდვილად გამოჩნდა, რომ საქართველოს პარლამენტს სჭირდება პოლიტიკური მსჯელობა, პოლიტიკური დებატები, აზრის გამოთქმა. გამოჩნდა, ის, რაც არის პარლამენტი - ადგილი, სადაც პოლიტიკური მსჯელობა მიმდინარეობს, ეს საჭიროება იყო. მიხარია, რომ ეს დებატები შედგა, მიუხედავად იმისა, რომ საკუთარი თავის მიმართ ბევრი კრიტიკა მოვისმინე. ეს არის დემოკრატიის შემადგენელი ნაწილი და ბუნებრივიც არის. ერთი მხრივ, სახელისუფლებო მხარე მაკრიტიკებდა იმასთან დაკავშირებით, რომ ვიყავი ზედმეტად კრიტიკული, მეორე მხრივ, ოპოზიციისთვის არ ვიყავი საკმარისად კრიტიკული“, - განაცხადა მარგველაშვილმა.