ძალიან მძიმე სურათი დაიხატა პრეზიდენტის მოხსენებაში და მე ვფიქრობ, რომ ეს სურათი არ ასახავს სინამდვილეს ჩვენ ქვეყანაში, - ამის შესახებ საქართველოს პარლამენტის თავმჯდომარემ ირაკლი კობახიძემ პარლამენტის სხდომაზე პრეზიდენტის ყოველწლიური ანგარიშის შეფასებისას განაცხადა.

როგორც ირაკლი კობახიძემ აღნიშნა, პრეზიდენტის გამოსვლას მნიშვნელოვანწილად აკლდა ობიექტურობა.

„ჩვენმა კოლეგებმა დღეს აღნიშნეს არაერთგზის, რომ ამ მოხსენებას აკლდა მნიშვნელოვანწილად ობიექტურობა და მე სამწუხაროდ უნდა გავიზიარო. ძალიან მძიმე სურათი დაიხატა პრეზიდენტის მოხსენებაში და ვფიქრობ, რომ ეს სურათი არ ასახავს სინამდვილეს ჩვენ ქვეყანაში.შეგახსენებთ, რამდენიმე ფრაზას, მაგალითად, საუბარი იყო პრეზიდენტის მოხსენებაში იმაზე, რომ იყო ძალაუფლების კონცენტრაციის საფრთხე და ეს საფრთხე იქცა სერიოზულ პრობლემად. ეს არის საკმაოდ მძიმე განცხადება. მმართველი ძალა ჩაიკეტა საკუთარ თავში, ესეც არის ძალიან მძიმე განცხადება. ასევე საუბარი იყო იმაზე, რომ მოქალაქე დაუცველია და როდესაც ხელყოფილია მისი უფლება- ილოცოს. როდესაც მას ამცირებენ ეთნიკური წარმომავლობის გამო, როდესაც მას ჩაგრავენ სექსუალური ორიენტაციის გამო, როდესაც მას არასათანადოდ ეპყრობიან სამართალდამცველები, როდესაც მას დევნიან პოლიტიკური ნიშნით, როდესაც მას უკანონოდ უსმენენ, ეს არის ძალიან მძიმე ფრაზები. გასაგებია, რომ თავში და ბოლოში ერთგვარად განეიტრალებული იყო ეს ფრაზები, თუმცა ადვილად გამოსაცნობი იყო, რომ მედია ამ ფრაზებს გამოიყენებდა ზუსტად ისე, როგორც გამოიყენა და აქცია ეს ფრაზები ე.წ. ჰედლაინებად, რომელიც მთლიანად აცდენილია იმ რეალობას, იმ სინამდვილეს, რომელიც არის ჩამოყალიბებული დღეს ქვეყანაში“, - აღნიშნა ირაკლი კობახიძემ.

მისივე თქმით, პრეზიდენტის გამოსვლაში საუბარი იყო მედიაში სახიფათო და გამჭვირვალე პროცესებზე და შეფასება სასამართლო კრიზისი, უმძიმესია.

„სასამართლო კრიზისი, ეს არის უმძიმესი შეფასება, საუბარი იყო იმაზე, რომ ხალხს ვართმევთ პრეზიდენტის არჩევის უფლებას და საუბარი იყო იმაზე, რომ ეს არ უნდა იყოს დღევანდელ ან მომავალ პრეზიდენტზე. აქ იყო პირდაპირი მინიშნება ე.წ. არაფორმალურ მმართველობაზე, რომელსაც არანაირი მტკიცებულება მით უმეტეს ამ კონკრეტულ შემთხვევაში საუბარი იყო მრავალჯერ იმედგაცრუებულ ამომრჩეველზე. რაც შეეხება რეალობას, ამაზე მინდა, ჩემი მოსაზრება მოგახსენოთ - არ არის ქართული რეალობა ისეთ ფერებში დახატული, როგორიც შვეიცარიაში, რომლის შიდა პროდუქტი ჩვენზე 10-ჯერ და 20-ჯერ მეტი აქვს, თუმცა ის სურათი რომელიც დღეს იყო წარმოდგენილი დღევანდელ სინამდვილეს არ შეესაბამება’, - განაცხადა ირაკლი კობახიძემ.

მისივე თქმით, როდესაც საუბარია დემოკრატიისა და ადამიანის უფლებებზე, აუცილებელია სრულფასოვნად მოხდეს სურათის წარმოჩენა.

„შეგახსენებთ, რა ხდებოდა საქართველოში ჩვენი ხელისუფლების მოსვლამდე და რა ხდება დღეს. ბიზნესის რეკეტი იყო ყოველდღიურობა 2012 წლამდე და ბიზნესის რეკეტს არაერთი ადამიანის ინტერესი და სიცოცხლეც კი ეწირებოდა. ბიზნესის ტოტალური რეკეტის პრაქტიკა ეს მთლიანად აღკვეთილია საქართველოში, ეს არის ის რეალობა, რომელშიც ჩვენ დღეს ვცხოვრობთ. ციხეებთან დაკავშირებით, ჩვენ არაერთხელ გვისაუბრია 2 ნახევარჯერ არის შემცირებული პატიმართა რიცხოვნობა საქართველოში, ეს არის ამ ხელისუფლების დამსახურება.12-ჯერ არის შემცირებული პატიმართა სიკვდილიანობის მაჩვენებელი. ეს არ არის დაკავშირებული პირობების გაუმჯობესებასთან. ეს მიუთითებს იმაზე, როგორ პრაქტიკა იყო ჩამოყალიბებული ციხეებში, როგორც აწამებდნენ ყოველდღიურ რეჟიმში ადამიანებს და რა პირობებში უწევდათ მათ ყოფნა სასჯელაღსრულების დაწესებულებაში. 2012 წლის შემდეგ ადმინისტრაციის მხრიდან პატიმრების წამების არც ერთი ფაქტი არ დაფიქისრებულა. თქვენ გახსვოვთ, რას უპირიპისრებდა შეკრების თავისუფლებას ხელისუფლება, ეს იყო სისასტიკე და არც ერთი პრეცედენტი არათუ სისასტიკის, დაპირისპირების, არამედ არც ერთი ძალადობრივი დარბევის პრეცედენტი არ გვქონია“, - განაცხადა ირაკლი კობახიძემ.