დღეს, თბილისის საკრებულოს სხდომაზე, დედაქალაქის ბიუჯეტში შემავალ ცვლილებებს განიხილავენ.

ფინანსური დოკუმენტის კორექტირების საკითხი დღის წესრიგში მას შემდეგ დადგა, რაც დედაქალაქის მთავრობამ ბავშვთა სამყაროს დაზარალებული მოვაჭრეების დახმარება გადაწყვიტა.

როგორც საკრებულოს საფინანსო-საბიუჯეტო კომისიის თავმჯდომარე აცხადებს, 350-მდე დაზარალებული მოქალაქე ერთჯერად - 3000 ლარიან დახმარებას თბილისის მერის სარეზერვო ფონდიდან მიიღებს.

ჯაბა სამუშიას თქმით, ფონდში არასაკმარისი თანხის გამო, საკრებულო დამატებით ერთ მილიონ ლარს გადარიცხავს. ჯაბა სამუშია აცხადებს, რომ გარდა ერთჯერადი დახმარებისა, სოციალურად დაუცველი მოქალაქეები, დამატებით გამგეობისგან 500-დან 1500-ლარამდე დახმარებასაც მიიღებენ.