ოკუპირებული ცხინვალის რეგიონის ე.წ. პრეზიდენტობის კანდიდატი და ე.წ. პარლამენტის სპიკერი, ანატოლი ბიბილოვი აცხადებს, რომ გუშინ ოკუპირებულ რეგიონში ჩატარებულ არაღიარებულ არჩევნებში გამარჯვება მან მოიპოვა.

„ჩვენ შევაგროვეთ ყველა პროტოკოლი, რომლებსაც ყველა კანდიდატის წარმომადგენლები აწერენ ხელს. ჩვენ მიერ ყველა პროტოკოლის შეჯამებისა და დამუშავების შემდეგ, მე ხმების 54,9 პროცენტი მოვიპოვე. ასე რომ, მე ვთვლი თავს გამარჯვებულად“, - განუცხადა ბიბილოვმა რუსულ მედიას.

ე.წ. საარჩევნო კომისიის მონაცემებით კი, ჯერ ხმათა 35%-ია დათვლილი და ბილილოვი 48,7%, ოკუპირებული რეგიონის მარიონეტული რეჟიმის ლიდერმა ლეონიდ თიბილოვმა კი 26,5% მიიღო.

ე.წ. არჩევნები ოკუპირებულ რეგიონში გუშინ ჩატარდა. გარდა ამისა, მარიონეტულმა რეჟიმმა გამართა ე.წ. რეფერენდუმიც, რომელზეც გატანილი იყო საკითხი ოკუპირებული რეგიონისთვის „ალანიის“ დარქმევის შესახებ, რასაც, ე.წ. საარჩევნო კომისიის განცხადებით, ამომრჩეველთა 78-მა პროცენტმა დაუჭირა მხარი.