აღდგომის დღესასწაულთან დაკავშირებით, ისრაელის სახელმწიფოში საზღვრის გაკვეთის პროცედურები კიდევ უფრო გამკაცრდება, - ამის შესახებ საქართველოში ისრაელის ელჩთან ერთობლივ პრესკონფერენციაზე საქართველოს საგარეო უწყების წარმომადგენელმა გიორგი ტაბატაძემ განაცხადა.
მისივე თქმით, დღესასწაულთან დაკავშირებით, ისრაელის სახელმწიფოში საზღვრის კვეთის პროცედურები კიდევ უფრო გამკაცრდება, მკაცრი და ხანგრძლივი იქნება შემოწმება.
„შესაბამისად, ჩვენი თხოვნაა, რომ საქართველოს მოქალაქეებმა მაქსიმალურად ზედმიწევნით დაიცვან ის მოთხოვნები, რაც მნიშვნელოვანია საზღვრის გადაკვეთის დროს. კერძოდ, მგზავრობის მიზნობრიობა, ფინანსური უზრუნველყოფა, მოთხოვნის შემთხვევაში, წარადგინონ გარკევეული გარემოებების დამადასტურებელი დოკუმენტები, სად იცხოვრებენ, რა აქვთ გამიზნული, რამდენი ხანი უნდა დარჩნენ ქვეყანაში და აქვთ თუ არა უკან დასაბრუნებელი ბილეთები”, - განაცხადა ტაბატაძემ.
მისივე თქმით, ქვეყანაში შესვლის შემდეგაც მომლოცველები უნდა დაემორჩილონ ყველა იმ მოთხოვნას, რომელიც შესაძლოა, წაუყენონ სამართალდამცველებმა და იმ სასულიერო პირებმა, რომლებიც ტაძარში წესრიგს იცავენ.
“ნებისმიერი შეპასუხება თუ უკმაყოფილება შესაძლოა, აღიქვან გარკვეულ დარღვევად და ამას მოჰყვეს მყისიერი, ადეკვატური რეაქცია. ზომები გამკაცრებულია, ჩასულია უამრავი სტუმარი და ყოველგვარი დაუმორჩილებლობა ან უკმაყოფილება შესაძლოა, გახდეს იმის მიზეზი”, - განაცხადა ტაბატაძემ.