34 მომხრე, არცერთის წინააღმდეგ - საკრებულოს რიგგარეშე სხდომაზე დედაქალაქის ბიუჯეტში ცვლილებების შეტანის საკითხი დამტკიცდა, რომლის მიხედვითაც, მერიის სარეზერვო ფონდში 1 მლნ ლარი ჩაირიცხება.

აღნიშნული თანხა „ბავშვთა სამყაროში“ ხანძრის შედეგად დაზარალებულ 345 ადამიანს უახლოეს დღეებში დაურიგდება.

კენჭისყრის პროცესს ფრაქცია „ევროპული საქართველოს“, „თბილისისა“ და „რესპუბლიკელების“ წევრები არ დაესწრნენ.

როგორც ფრაქცია „ევროპული საქართველოს“ წევრმა მამუკა ახვლედიანმა აღნიშნა, მთავარია, ეს არ იყო ერთჯერადი დახმარება და დაზარალებულებს ბანკებთან ურთიერთობასა და ალტერნატიული ფართებით უზრუნველყოფითაც დაეხმარონ.

ფრაქცია „ნაციონალური მოძრაობის“ წევრი მარიკა დათუკიშვილი კი ზარალის ოდენობის სრულად დადგენასა და გამოძიების ბოლომდე მიყვანას ითხოვს.