„ციანიდის საქმეზე“ დაკავებული დეკანოზის გიორგი მამალაძის მოსანახულებლად მისულმა მამა რევაზ სიხარულიძემ სასჯელაღსრულების მეცხრე დაწესებულება უკვე დატოვა.
მამა რევაზის განცხადებით, მან მამა გიორგის აღსარება ჩაიბარა.
„მე შემოვედი არა მარტო მოსანახულებლად, არამედ აღსარებაც ჩავიბარე. მისი ჯანმრთელობა ძალიან მაწუხებდა. ვისთვის, ეს შიმშილობა იყო, ვისთვის ეს მკაცრი მარხვა იყო - ეს თავად იფიქრონ. ახლა ნორმალურად იკვებება, ნორმალურად გრძნობს თავს. აღსარება ჩავიბარე“, - განაცხადა მამა რევაზ სიხარულიძემ.
რაც შეეხება ზიარებას, მისი თქმით, ასეთ ვითარებაში დაკავებული დეკანოზის ზიარება მღვდელმთავრების პრეროგატივაა.
„ამ შემთხვევაში, ზიარება ჩემი პრეროგატივა ვერ იქნება, რადგანაც სინოდზე მას შეჩერებული აქვს მღვდელთმსახურება, ეს უნდა მოხდეს მას შემდეგ, რაც გამოძიება დამთავრდება და ეს მღვდელმთავრების პრეროგატივაა“, - განაცხადა მამა რევაზ სიხარულიძემ.
მამა რევაზის თქმით, აღსარება არის სრულად კონფიდენციალური.
„რასაც აღსარებაში მეტყვიან, მამა გიორგი იქნება თუ სხვა, ეს სამარეში უნდა წავიღო“, - თქვა მამა რევაზ სამხარაძემ.
რაც შეეხება ჟურნალისტების კითხვას, კვლავ ითხოვს თუ არა დაკავებული დეკანოზი სრულიად საქართველოს კათოლიკოს-პატრიარქთან შეხვედრას, მამა რევაზ სიხარულიძემ აღნიშნა, რომ დაკავებულ დეკანოზს ეს სურს, თუმცა გამოძიების დასრულებამდე ეს რამდენად მოხერხდება, ამის თქმა ძნელია.
„ის ცდილობს, რომ თავი გაიმართლოს და ეს გამოძიების დასრულების შემდეგ გამოჩნდება“, - განაცხადა მამა რევაზ სიხარულიძემ.
დეკანოზმა რამდენიმე დღის წინ ორი სასულიერო პირი - მამა რევაზ სიხარულიძე და კახაბერ გოგოტიშვილი დაასახელა, რომელთა საპყრობილეში შესვლაც მას სურდა.