დაპირისპირების ახალი ტალღა მმართველ გუნდსა და პრეზიდენტს შორის. პარლამენტის თავმჯდომარე გიორგი მარგველაშვილს ადამიანის უფლებათა ევროპულ სასამართლოზე ზეგავლენის მცდელობაში ადანაშაულებს.

საქმე ეხება სტრასბურგში ,,რუსთავი 2-თან” დაკავშირებით მიღებულ იმ გადაწყვეტილებას, რომლითაც უზენაესი სასამართლოს განჩინების აღსრულება უვადოდ შეჩერდა.

დაკონკრეტების გარეშე, ირაკლი კობახიძე ანალოგიურ ბრალდებას უყენებს პოლიტიკურ პარტიებსა და არასამთავრობო ორგანიზაციებსაც.

საკანონმდებლო ორგანოს თავმჯდომარე ახსენებს სტრასბურგში გაგზავნილ პირად ელექტრონულ შეტყობინებებსაც. სპიკერის მიერ ნახსენები პირების მხრიდან ირიბ ზეწოლაზე საუბრობს ვიცეპრემიერი კახა კალაძეც. განცხადების ადრესატების რეაქციები მწვავეა.