„ნაციონალურმა მოძრაობამ“ საკონსტიტუციო კომისია დატოვა. ამის შესახებ რომან გოცირიძემ საგანგებო ბრიფინგზე განაცხადა.

„ერთიანმა ნაციონალურმა მოძრაობამ“ გადაწყვიტა, დატოვოს საკონსტიტუციო კომისია. პირველ რიგში უნდა ითქვას, რომ ჩვენ, ისევე როგორც სხვა წევრებმა, არასამთავრობო ორგანიზაციებმა, პოლიტიკურმა პარტიებმა, მაქსიმალურად შევეცადეთ, რომ საკონსტიტუციო კომისიის მუშაობა ყოფილიყო წინ გადადგმული ნაბიჯი, ქვეყანაში დემოკრატიული პროცესების განვითარებისაკენ. სამწუხაროდ აღმოჩნდა, რომ ხელისუფლებას ამოძრავებდა სხვა მიზნები, რომელიც გამოიხატებოდა ძალაუფლების უზურპაციაში და ეს კომისია გამოყენებული იყო სწორედ ამ მიზნების მისაღწევად.

დღეს უკვე ნათელია, რომ მიღებული დოკუმენტი ადამიანებს ფაქტობრივად უზღუდავს თავისუფალი არჩევანის უფლებას. საქართველოს პრეზიდენტი არ იქნება არჩეული პირდაპირი წესით, იზღუდება მისი მრავალი ფუნქცია, რომლებიც დემოკრატიის გარანტი იყო ქვეყანაში.

საარჩევნო წესები იცვლება იმ ფორმით, რომ მმართველმა ხელისუფლებამ შეინარჩუნოს ძალაუფლება და მოირგოს კონსტიტუცია საკუთარი პოლიტიკური მიზნების მისაღწევად.

ასევე, მნიშვნელოვანია ის ფაქტი, რომ ამ კომისიის მუშაობით მიღებულ დოკუმენტში, ფაქტობრივად, ქუთაისი, როგორც საპარლამენტო დედაქალაქი, არის გაუქმებული და ხდება რეგიონული პრინციპების დასუსტება, რაც ასევე უკან გადადგმული ნაბიჯია ქვეყნის განვითარების თვალსაზრისით.

„ნაციონალური მოძრაობა“ გამოთქვამს იმედს საერთაშორისო ორგანიზაციები, დემოკრატიული ინსტიტუტები, მათ შორის ვენეციის კომისია ყურადღებას მიაპყრობს მიმდინარე პროცესებს

იმედს ვიტოვებთ, რომ ხელისუფლება გაითვალისწინებს როგორც ჩვენი, ისე სხვა პოლიტიკური პარტიებისა და საზოგადოებრივი ორგანიზაციების შენიშვნებს და ქვეყანაში არ მიიღებს ისეთ კანონს, რომელიც სერიოზულად შეაფერხებს ქვეყნის განვითარებას და რომელიც თავისი შინაარსით უნდა ყოფილიყო ქვეყნის წინსვლისა და სტაბილური განვითარების გარანტი“, - განაცხადა რომან გოცირიძემ.