ბესლანის სკოლაში 2004 წელს მძევლების აყვანის ფაქტზე, ევროპის ადამიანის უფლებათა სასამართლომ რუსეთს ყოფილი მძევლებისა და მათი ოჯახებისთვის 3 მილიონამდე ევროს გადახდა დააკისრა.

სასამართლოს მიერ გავრცელებული პრესრელიზის თანახმად, სარჩელის ავტორი სულ 409 პირი იყო, მათ შორის ყოფილი მძევლები და მომხდარის დროს დაშავებულები, ასევე ყოფილი მძევლების, გარდაცვლილებისა და დაშავებულების ახლობლები.

სტრასბურგის სასამართლომ დაადგინა, რომ დაირღვა ევროპის ადამიანის უფლებათა კონვენციის მეორე მუხლი - სიცოცხლის უფლება.

მოსარჩელეები აცხადებდნენ, რომ ხელისუფლებამ ვერ შეასრულა დაკისრებული მოვალეობა, დაეცვა ადამიანები, რომელთა სიცოცხლე საფრთხის ქვეშ იყო. სარჩელში გამოთქმულია მოსაზრება, რომ მომხდარი არ იყო სათანადოდ გამოძიებული.

მოსარჩელეთა განცხადებით, ოპერაცია არ იყო სათანადოდ დაგეგმილი და მსხვერპლი გამოწვეული იყო ხელისუფლების მიერ ძალის არაპროპორციულად გამოყენებით.

ბესლანის სკოლაში თავდამსხმელებმა 1200-მდე მძევალი 2004 წლის პირველ სექტემბერს აიყვანეს, მათ შორის ბავშვები, მასწავლებლები და მშობლები. სკოლის აღება რუსეთის სპეცდანიშნულების ძალებმა შტურმით სცადეს. მომხდარის შედეგად, 334 ადამიანი დაიღუპა, მათ შორის 186 ბავშვი, ხოლო 126 ადამიანი დაშავდა. თავდასხმაზე პასუხისმგებლობა შამილ ბასაევმა აიღო.