უნგრეთის დედაქალაქში ათი ათასამდე ადამიანი პრემიერ-მინისტრის პოლიტიკის წინააღმდეგ გამოდის. ანტი-საემიგრაციო ზომებითა და ნაციონალისტური რიტორიკით ცნობილი ვიქტორ ორბანისგან, დემონსტრანტები საარჩევნო სისტემის რეფორმას ითხოვენ.

აქციის მონაწილეთა განცხადებით, 2012-2013 წლებში საარჩევნო კანონმდებლობაში შეტანილი ცვლილებები მმართველ პარტიას უპირატესობას ანიჭებს.

საპროტესტო აქციები ბუდაპეშტში ბოლო კვირების განმავლობაში არაერთხელ გაიმართა. გასულ კვირას მოქალაქეები იმ კანონპროექტის უკან გაწვევას მოითხოვდნენ, რომელიც ცენტრალური ევროპის უნივერსიტეტს დახურვის საშიშროების წინაშე აყენებს, თუმცა პარლამენტის მიერ დაჩქარებული წესით მიღებულ კანონპროექტს ქვეყნის პრეზიდენტმა მაინც მოაწერა ხელი.