დიდუბის ბაზრის მოვაჭრეები მერიის შენობაში შესვლას ცდილობენ, თუმცა საპატრულო პოლიციისა და მერიის დაცვის სამსახურის თანამშრომლები ამის საშუალებას არ აძლევენ.
მოვაჭრეები შენობაში მყოფ ადამიანებს გარეთ გამოსვლის საშუალებას არ აძლევენ და აცხადებენ, რომ „თუ ჩვენ არ გვიშვებენ შიგნით, მაშინ ვერავინ გამოვა გარეთ“.
პარტია "თავისუფალი საქართველოს" თავმჯდომარის, კახა კუკავას თქმით, საპატრულო პოლიცია არღვევს სისხლის სამართლის კოდექსის 33-ე მუხლს, რაც სამსახურეობრივი იფლებამოსილების გადამეტებას გულისხმობს. მისი თქმით, პოლიციას არ აქვს შენობის ბლოკირების უფლება. კუკავას განცხადებით, ისინი ტელეფონით დაუკავშირდებიან საკრებულოს დეპუტატებსა და სახალხო დამცველის აპარატს, რომ მათი წარმომადგენლები მერიასთან მოვიდნენ. შენობასთან გაძლიერებულია საპატრულო პოლიციის რაოდენობა.
დიდუბის ბაზრის მოვაჭრეები თბილისის მერიასთან აქციას მართავენ. მოვაჭრეების განცხადებით, დიდუბის რაიონში მდებარე ორ ბაზარსა და ორი შპს-ს ერთმანეთში აქვთ დავა და ამით მოვაჭრეები ზარალდებიან.
მათივე თქმით, ერთ-ერთი შპს-ს მფლობელმა ორ ბაზარს შორის კედელი ააშენა, რამაც დიდუბის ბაზარი ორ ნაწილად გაყო. როგორც მოვაჭრეები აცხადებენ, კედლის აშენების შემდეგ მათ აღარ ეძლევათ პროდუქტის რეალიზაციის საშუალება და ასევე ირღვევა უსაფრთხოების ნორმები.
მოვაჭრეებმა ზედამხედველობის სამსახურს საჩივრით უკვე მიმართეს. როგორც მოვაჭრეები განმარტავენ, მერიამ კედლის დემონტაჟის ბრძანება გასცა, თუმცა რეაგირება ჯერ კიდევ არ მომხდარა.