საფრანგეთის საპრეზიდენტო არჩევნებში მონაწილეთა ხმების 96 %-ის დათვლის შედეგად, პრეზიდენტობის ცენტრისტ კანდიდატ ემანუელ მაკრონსა და ულტრამემარჯვენე მარინ ლე პენს შორის პროცენტული სხვაობა გაიზარდა.

ამ დროისთვის მაკრონი კვლავ პირველ ადგილზეა და მას ხმათა 23,91 % აქვს, ლე პენს კი არჩევნებში მონაწილეთა 21,42 % უჭერს მხარს. მონაცემები საფრანგეთის შინაგან საქმეთა სამინისტროს ვებგვერდზე რამდენიმე წუთის წინ განახლდა.

ხმათა 85 %-ის დათვლის შემდეგ, კანდიდატებს შორის სხვაობა დაახლოებით 1 %-ს შეადგენდა.

ამ დროის მონაცემებით, სწორედ მაკრონი და ლე პენი მიიღებენ მონაწილეობას 7 მაისს დაგეგმილ მეორე ტურში.

მესამე ადგილზეა ფრანსუა ფიონი 19,94 %-ით, ხოლო ჟან-ლუკ მელანშონს 19,54 % აქვს. დანარჩენმა კანდიდატებმა ხმათა 7 %-ზე ნაკლები მოაგროვეს.