ევროკავშირის უმაღლესი წარმომადგენელი საგარეო პოლიტიკისა და უსაფრთხოების საკითხებში ფედერიკა მოგერინი იმედოვნებს, რომ საფრანგეთისა და ევროკავშირის დროშები ერთად დარჩებიან.

ამის შესახებ მოგერინიმ რუსეთის საგარეო საქმეთა მინისტრ სერგეი ლავროვთან ერთად გამართულ პრესკონფერენციაზე განაცხადა.

მოგერინს საფრანგეთის საპრეზიდენტო არჩევნების პირველი ტურის შედეგებზე ჰკითხეს.

მისივე თქმით, ის მოხარულია, რომ საფრანგეთისა და ევროკავშირის დროშებს ერთად ხედავს.

„იმედი მაქვს, ფრანგული და ევროპული დროშები ერთად იქნება“,- განაცხადა მოგერინიმ.

ამასთან, დიპლომატს მიაჩნია, რომ ევროკავშირის წევრობა სუვერენიტეტის დაკარგვას არ ნიშნავს.

ფედერიკა მოგერინი მოსკოვში იმყოფება. მან შეხვედრა გამართა რუსეთის საგარეო საქმეთა მინისტრ სერგეი ლავროვთან. დიპლომატებმა ტერორიზმთან ბრძოლაზე, სირიის კონფლიქტსა და რუსეთსა და ევროკავშირს შორის ურთიერთობებზე ისაუბრეს.

საფრანგეთის საპრეზიდენტო არჩვენების მეორე ტურში ქვეყნის ეკონომიკის ყოფილი მინისტრი ემანუელ მაკრონი და პარტია „ეროვნული ფრონტის“ ლიდერი მარინ ლე პენი გავიდნენ.

საპრეზიდენტო არჩევნების პირველ ტურში მაკრონმა ამომრჩეველთა ხმების 23,75% მიიღო, ლე პენმა კი 21,53%.

საფრანგეთის საპრეზიდენტო არჩევნების მეორე ტური 7 მაისს გაიმართება.