საერთაშორისო სავალუტო ფონდისა და მსოფლიო ბანკის შეხვედრაზე, მსოფლიოს წამყვანი 24 ქვეყნის ფინანსთა მინისტრებმა და ცენტრალური ბანკების პრეზიდენტებმა, კომუნიკედან პროტექციონისტულ სავაჭრო პოლიტიკასთან ბრძოლის საკითხი ამოაგდეს, მიუხედავად იმისა, რომ სხდომის დაწყებამდე სავალუტო ფონდმა, განახლებულ ეკონომიკურ მიმოხილვაში ხაზგასმით აღნიშნა, რომ პროტექციონიზმის მომძლავრება სერიოზულ რისკს უქმნის გლობალურ ეკონომიკას.
ამის ნაცვლად ლიდერები შეთანხმდნენ, რომ თავი აარიდონ მხოლოდ ქვეყნის შიდა ინტერესებზე ორიენტირებულ ეკონომიკურ პოლიტიკას.
ანალიტიკოსების ნაწილი დამოკიდებულების ამგვარ ცვლილებას შეერთებული შტატების პრეზიდენტის გავლენას მიაწერს, ნაწილი კი თვლის, რომ მთლიანად მსოფლიო ნაკლებად ღია ეკონომიკის მომხრე გახდა.