ჟურნალისტი ნინო მიქიაშვილი საქართველოს ეროვნული მუზეუმის ადმინისტრაციას, ეროვნული მუზეუმების გაერთიანებაში შემავალი ობიექტების მიმართ გულგრილობასა და უყურადღებობაში ადანაშაულებს.
მიქიაშვილი 2017 წლის 7 მარტს, დიმიტრი შევარდნაძის სახელობის ეროვნულ გალერეაში მომხდარი ხანძრის შემთხვევაზე საუბრობს, რომლის დროსაც შენობის ნულ სართულზე მდებარე სათავსოში არსებული მაღალი ძაბვის ელექტროტრანსფორმატორი დაიწვა. ჟურნალისტი შსს-ს იმ დოკუმენტსაც ასაჯაროვებს, რომელშიც სახანძრო სამაშველო სამსახურის მიერ ჩატარებული მოქმედებებია აღწერილი.
დოკუმენტში აღნიშნულია, რომ ხანძრის სრული ლოკალიზებისთვის ჯგუფს დაახლოებით 4 საათი დასჭირდა. ხოლო ხანძრის მიზეზებისა და ზარალის ოდენობის დასადგენად, საქმე თბილისის პოლიციის დეპარტამენტის ძველი თბილისის სამმართველოს გადაეცა.
რეპორტიორის პრესკლუბში ჟურნალისტმა ეროვნული მუზეუმის გაერთიანებაში შემავალ მუზეუმებში ხანძრის და ძარცვის სხვა შემთხვევებიც გაიხსენა, რაც, მისი თქმით, იმის ნიშანია, რომ ეროვნულ მუზეუმში პროცესები არ კონტროლდება.