ჯანდაცვის მსოფლიო ორგანიზაციის ევროპის რეგიონულმა ბიურომ 2017 წლის 24-30 აპრილის პერიოდი ევროპის იმუნიზაციის კვირეულად გამოაცხადა.

კვირეულის სლოგანია „ვაქცინები მოქმედებს! აცერი და დაიცავი!". იმუნიზაციის კვირეულს საქართველოც შეუერთდა.

კვირეულის ფარგლებში, დაგეგმილია ცნობიერების ასამაღლებელი ღონისძიებები, შეხვედრები პარტნიორ ორგანიზაციებთან.

ბათუმსა და ქუთაისში ადგილობრივ ხელისუფლებასთან იმუნიზაციის პროგრამის მიმდინარეობის შესახებ შეხვედრები გაიმართება.

იმუნიზაციის კვირეულის განმავლობაში განსაკუთრებული ყურადღება გამახვილდება წითელასა და წითურას ელიმინაციის, პოლიომიელიტის გლობალური ერადიკაციის პროცესში მიღწეულ პროგრესსა და არსებულ გამოწვევებს.

2017 წლის ბოლოს საქართველოში დაიწყება ადამიანის პაპილომა ვირუსის საწინააღმდეგო ვაქცინაციის ეტაპობრივი დანერგვა.

აცრები ჩატარდება ცხრა წლის გოგონების ასაკობრივ ჯგუფში. აღნიშნული ვაქცინაცია საშვილოსნოს ყელის კიბოს პრევენციის საშუალებაა.

დაავადებათა კონტროლის ეროვნული ცენტრის დირექტორის თქმით, მნიშვნელოვანია იმუნიზაციის მიმართ პოლიტიკური მხარდაჭერის შენარჩუნება, რათა მოსახლეობამ გადამდები დაავადებები თავიდან აიცილოს.