„ყაზტრანსგაზ-თბილისის“ გენერალური დირექტორი სანჟარ შოკატაევი საქართველოს მთავრობასთან მორიგებას არ გამორიცხავს.

როგორც სანჟარ შოკატაევმა საზოგადოებრივს განუცხადა, შეთანხმების შემთხვევაში, კომპანია სარჩელს გამოითხოვს.

„ორი ვარიანტია - ან კომპანიის დაბრუნება, ან მისი გამოსყიდვა, ანუ ჩვენს მიერ ჩადებული ინვესტიციების დაბრუნება. ერთი წლის წინ გაიგზავნა შეტყობინება. გვქონდა დრო მოლაპარაკებისთვის, რომელიც უშედეგო აღმოჩნდა. ყველაფერი იურიდიული პროცედურების შესაბამისად მიდის, მაგრამ ამით მოლაპარაკებები არ გაუქმებულა. თუ შედგა შეთანხმება, სარჩელი იქნება გამოთხოვილი“, - აცხადებს შოკატაევი.

ყაზახი ინვესტორები საქართველოს მთავრობას საერთაშორისო საარბიტრაჟო სასამართლოში უჩივიან. სარჩელის თანხა 180 მილიონი დოლარია. საქმე ეხება საქართველო ენერგეტიკის მარეგულირებელი კომისიის მიერ 2009 წელს მიღებულ გადაწყვეტილებას, რომლის მიხედვითაც ყაზახურ მხარეს გაზგამანაწილებელი კომპანია ,,ყაზტრანსგაზ-თბილისის’’ მართვის უფლება ჩამოერთვა და კომპანიის ხელმძღვანელის პოსტი სემეკის მიერ დანიშნულ დროებით მმართველს გადაეცა.

ოფიციალური ინფორმაციით, გადაწყვეტილების მიზეზი გახდა ის, რომ კომპანიას ბუნებრივი გაზის შესყიდვაზე ნავთობისა და გაზის კორპორაციის მიმართ 80 მილიონ ლარის დავალიანება დაუგროვდა და კომპანიის გადახდისუნარიანობა საფრთხის ქვეშ დადგა. 8 წლის განმავლობაში ყაზახური მხარე კომპანიის მართვაში დაბრუნებას ითხოვდა. არაერთი შეხვედრა შედგა ენერგეტიკის მინისტრთან, თუმცა შეთანხმება ვერ მოხერხდა.