27,76 ქულით საქართველო მედიათავისუფლების მიმართულებით 64-ე ადგილზეა. საერთო შეფასებით ქვეყანა “შესამჩნევი პრობლემების” კატეგორიაშია,

ორგანიზაციამ „რეპორტიორები საზღვრებს გარეშე“ 2017 წლის მსოფლიო პრესის თავისუფლების ინდექსი გამოიკვლია, სადაც საქართველომ წინა წლის შედეგი გაიმეორა და 180 ქვეყანას შორის 64-ე ადგილი დაიკავა.

ავტორიტეტული ორგანიზაციის ანგარიშში აღნიშნულია, რომ ბოლო წლების განმავლობაში გაუმჯობესებული მედიაგარემოს მიუხედავად, საქართველოში კვლავ საფრთხედ რჩება მედიის პოლარიზება და სარედაქციო საქმიანობაზე გავლენების ფაქტი.

ანგარიშის ავტორები აღნიშნავენ, რომ ძირითადი სატელევიზიო არხების ფლობასთან დაკავშირებული დავა მედიაპლურალიზმის მომავლს საფრთხეს უქმნის.

ანგარიშში ნახსენებია „რუსთავი 2-ის“ საქმე, რომლის სამომავლო განვითარებაც, ავტორების თქმით, ქვეყნისთვის „ტესტი იქნება “.

ანგარიშში მკვლევარები მედიათავისუფლების მხრივ, მსოფლიოს მასშტაბით, საფრთხის შემცველ სიგნალებზე მიუთითებენ, საუბარია სახიფათო ტენდენციებსა და პროპაგანდის ზრდაზე.