ევროსაბჭოს საპარლამენტო ასამბლეის წევრები ასამბლეის პრეზიდენტ პედრო აგრამუნტს უნდობლობას უცხადებენ და მის გადადგომას კატეგორიულად ითხოვენ.
როგორც საზოგადოებრივის ჟურნალისტი სტრასბურგიდან იუწყება, ამ საკითხზე პოლიტიკურ ჯგუფებში უკვე მიმდინარეობს კენჭისყრები და ჯგუფების წარმომადგენლები აგრამუნტისგან ითხოვენ გარანტიას, რომ პარასკევს, 28 აპრილს ის ნამდვილად გააკეთებს განცხადებას გადადგომის შესახებ. აგრამუნტის გადადგომის მოთხოვნას მხარს უჭერს საქართველოს დელეგაციაც.
აგრამუნტის გადაყენების საკითხის დასმაში განსაკუთრებით აქტიურობს სოციალისტების ჯგუფი. ამასთან, აგრამუნტის გადადგომის მომხრეები არიან „ევროპის სახალხო პარტიის“ წარმომადგენლები, რომლის წევრიც თავად აგრამუნტიც არის.
როგორც პარტიის წარმომადგენლები აცხადებენ, შექმნილია ექსტრაორდინარული ვითარება და ხვალ პედრო აგრამუნტთან კონსულტაციები გაიმართება. სპეციალურად ამ კონსულტაციებში მონაწილეობისთვის, გერმანიაში ვიზიტს წყვეტს და ხვალ სტრასბურგში ჩავა ევროსაბჭოში „ევროპის სახალხო პარტიის“ ჯგუფის ხელმძღვანელი აქსელ ფიშერი.
საზოგადოებრივის ჟურნალისტის ინფორმაციით, ხვალ ევროსაბჭოს საპარლამენტო ასამბლეაში დაგეგმილია ესპანეთის მეფის სიტყვით გამოსვლა. საპარლამენტო ასამბლეის წევრები აცხადებენ, რომ იმ შემთხვევაში, თუ აგრამუნტისგან გადადგომის გარანტიებს არ მიიღებენ, მისი ქვეყნის მონარქის სიტყვით გამოსვლას არ დაესწრებიან.
ევროსაბჭოს საპარლამენტო ასამბლეის პრეზიდენტს პედრო აგრამუნტს საპარლამენტო ასამბლეის წევრები რუსი დეპუტატის თანდასწრებით სირიის პრეზიდენტთან შეხვედრის გამო დაუპირისპირდნენ.
თავად ევროპის საბჭოს საპარლამენტო ასამბლეის პრეზიდენტმა განმარტა, რომ ოფიციალური ვიზიტით არაერთ კონფლიქტურ სახელმწიფოში ყოფილა, თუმცა სირიაში სტუმრობისას ის რუსულ გარემოცვაში აღმოჩნდა და სწორედ ამიტომ ბაშარ ალ-ასადთან მის შეხვედრას მედიაში არასწორი ინტერპრეტაცია მოჰყვა.
რეგლამენტით პედრო აგრამუნტის გადაყენება და იმპიჩმენტის საკითხის დასმა დეპუტატებს არ შეუძლიათ.