საპარლამენტო უმრავლესობის ლიდერი არჩილ თალაკვაძე ფიქრობს, რომ გაზეთ „ქრონიკა პლუსის“ რედაქტორი ელისო კილაძე პროკურატურამ მოწმეთა დაცვის პროგრამაში უნდა ჩართოს. უმრავლესობის ლიდერი ვარაუდობს, რომ შესაძლოა ელისო კილაძის წინააღმდეგ მოეწყოს პროვოკაცია და ეს გამოიყენონ სახელმწიფო უსაფრთხოების სამსახურის წინააღმდეგ.
"შემთხვევითი არ არის, რომ ბოლო თვეების განმავლობაში მიმდინარეობს მიზანმიმართული შეტევა ძალოვან უწყებებზე, მიმდინარეობს მათი დისკრედიტაციის მცდელობა. აქვე მინდა, კომენტარი გავაკეთო ქალბატონ ელისო კილაძის საკითხთან დაკავშირებით. ჩვენ ყურადღებით ვეკიდებით ამ საკითხს, მესმის მისი, როგორც დედის წუხილები, მაგრამ ამ ეტაპზე აშკარაა, რომ ის ცდილობს, შვილის საკითხი მთლიანად სუს-ს და სოსო გოგაშვილს დაუკავშიროს. ამ ფონზე ჩნდება მაღალი ალბათობა, რომ ეს ფონი ვინმემ გამოიყენოს, "ნაციონალურმა მოძრაობამ" ან სხვა დესტრუქციულმა ძალებმა დაგეგმონ გარკვეული პროვოკაცია ქალბატონი ელისოს წინააღმდეგ და ეს გამოიყენონ სუს-ის, გოგაშვილის დისკრედიტაციისთვის. ამიტომ, ვფიქრობ, რომ საჭიროა, პროკურატურამ განიხილოს ქალბატონი ელისოს დაცვის პროგრამაში ჩართვის საკითხი",- განაცხადა არჩილ თალაკვაძემ.