არასწორად მიმაჩნია, როდესაც სუსტი მთავასარდლის შექმნით, ქვეყნის თავდაცვისუნარიანობა სუსტდება, - ამის შესახებ საქართველოს პრეზიდენტმა გიორგი მარგველაშვილმა სამცხე-ჯავახეთში პროექტის„კონსტიტუცია ყველასია“ ფარგლებში გამართულ შეხვედრაზე განაცხადა.
მისი თქმით, თავდაცვის შესუსტების მნიშვნელოვანი შემადგენელი უშიშროების საბჭოს გაქრობაა. როგორც პრეზიდენტი აღნიშნავს, ასეთ შემთხვევაში, საომარი მდგომარეობის დროს, პრეზიდენტს წარმოდგენა არ ექნება, როგორ მოიქცეს.
„კონსტიტუციიდან ამოღებულია ის მთავარი ორგანო, რომელიც პრეზიდენტს, როგორც უმაღლეს მთავარსარდალს აძლევს რჩევებს როგორც მშვიდობის, ასევე ომის პირობებში. ეს ორგანო შეცვლილია თავდაცვის საბჭოთი, რომელიც ფუნქციონირებს მხოლოდ ომის დროს. თანამედროვე ვითარებაში ომი ძირითადად ხორციელდება ჰიბრიდული ომის მეშვეობით. ამ ვითარებაში, უმაღლესი მთავარსარდალი დატოვებულია იმ მთავარი სათათბირო ორგანოს გარეშე, რომლითაც უნდა აწარმოოს დაპირისპირება მოწინააღმდეგესთან. წარმოიდგინეთ უმაღლესი მთავარსარდალი, რომელმაც ომის პერიოდში უნდა გამოსცეს დეკრეტები, რომელსაც წარმოდგენა აქამდე არ ჰქონია არაფერზე, რადგან არ ჰქონდა ეს სათათბირო ორგანო. ასეთი მთავარსარდალის შემთხვევაში იწყება ომი. მთვარსარდალი შედის თავდაცვის საბჭოში და არც იცის, რა უნდა მოიკითხოს, იმიტომ რომ სამხედრო სპეციფიკასთან არასდროს ჰქონია შეხება“, -განაცხადა გიორგი მარგველაშვილმა.
პრეზიდენტის აზრით, როდესაც საუბარია ნატო-ში ინტეგრაციაზე, იმ დიდ გმირობაზე, რომელსაც ჩვენი ჯარისკაცები ყოველდღე სჩადიან როგორც საქართველოს დაცვის, ასევე საერთაშორისო მისიებში მონაწილეობით, არ შეიძლება ამ ჯარის დატოვება მთავარსარდლის გარეშე. მისივე თქმით, ეს ნაბიჯი შეიძლება პოლიტიკური მოტივაციით არის განპირობებული, მაგრამ ქვეყნის თავდაცვისუნარიანობისთვის ნამდვილად არ არის სწორი.