თავდაცვის სამინისტროს საზოგადოებასთან ურთიერთობის დეპარტამენტის ხელმძღვანელმა ნინო თოლორდავამ საზოგადოებრივს სატელეფონო ინტერვიუში დაუდასტურა, რომ უმრავლესობის დეპუტატების - სოფიო კილაძისა და თამარ ხულორდავას - მეუღლეები მათი საკვალიფიკაციო მონაცემების გათვალისწინებით, დანიშნულები არიან დროებითი მოვალეობის შემსრულებლებად გენერალურ ინსპექციაში, განსაკუთრებულ დავალებათა ინსპექტორებად.
როგორც ნინო თოლორდავამ განმარტა, აღნიშნულმა პირებმა გაიარეს კონკურსი და საუკეთესო კანდიდატთან დაკავშირებით, გადაწყვეტილებას საკონკურსო-საატესტაციო კომისია მიიღებს.
„ევროპული საქართველო“ ხელისუფლებას ნეპოტიზმში ადანაშაულებს. როგორც პარტიის ერთ-ერთმა ლიდერმა ირმა ნადირაშვილმა დღეს გამართულ პრესკონფერენციაზე განაცხადა, მაშინ როდესაც თავდაცვის სამინისტროში ოპტიმიზაცია მიმდინარეობდა, უმრავლესობის წევრი დეპუტატების, თამარ ხულორდავასა და სოფიო კილაძის მეუღლეები, უწყებაში დაასაქმეს.
,,ჩვენ გვაქვს კითხვები ლევან იზორიასთან, რა ნიშნით განახორციელა მან ეს დანიშვნები და ვთხოვთ, რომ პასუხი გაგვცეს ამ კითხვაზე. გარდა ამისა, ჩვენ გვაქვს ასევე კითხვები ჩვენს კოლეგებთან, „ქართული ოცნების“ დეპუტატებთან, რა როლი შეასრულეს მათ საკუთარი მეუღლეების საჯარო სამსახურში მოწყობასთან დაკავშირებით", - განაცხადა ირმა ნადირაშვილმა.