ევროკავშირის მხრიდან თურქეთის ორგანიზაციაში გაწევრიანების ახალ პირობას ოფიციალური ანკარა პროვოკაციულად აფასებს. განცხადება თურქეთის საგარეო საქმეთა სამინისტროში გაკეთდა. მინისტრის მოადგილის კაან ეზნერის თქმით, ევროკავშირის ახალი მოთხოვნა, რომელიც ბევრ სხვა პირობასთან ერთად თურქეთში სიკვდილით დასჯის აკრძალვასაც გულისხმობს, პროვოკაციულია.
„თურქეთი ხვდება, რომ ეს წითელი ხაზია, თუმცა ვთვლით, რომ საქმე გვაქვს არაკონსტრუქციულ დიალოგთან. ეს არის ერთი მხარის გაგდება დიალოგიდან“ - აცხადებს მინისტრის მოადგილე.
თურქეთის საგარეო საქმეთა სამინისტროში ამბობენ, რომ ევროკავშირი კარგი პროექტია და მასში გასაწევრიანებლად თურქეთმა ყველა პირობა შეასრულა, ახლა გადაწყვეტილება ევროკავშირის ლიდერმა უნდა მიიღონ. თურქეთსა და ევროკავშირს შორის ასოცირების შეთანხმებას ხელი 1963 წელს მოეწერა. 1987 წელს ოფიციალურმა ანკარამ ორგანიზაციის წევრობაზე განაცხადი შეიტანა. მოლაპარაკებები ამ თემაზე კი, 2005 წელს დაიწყო.