კაფეებსა და რესტორნებში თამბაქოს მოხმარების აკრძალვის ვადამ გადაიწია. რეგულაციები მომავალი წლის 1-ლი იანვრის ნაცვლად, პირველი მაისიდან ამოქმედდება.
ამის შესახებ კანონპროექტის ავტორმა გუგული მაღრაძემ „თამბაქოს კონტროლის შესახებ“ კანონპროექტთა პაკეტის მეორე მოსმენით განხილვის შემდეგ განაცხადა.
ასევე ცნობილი ხდება, რომ მოწევა დასაშვები იქნება შესაბამისი ლიცენზიის მქონე სამორინეებსა და სიგარა-ბარებში.
გუგული მაღრაძის განცხადებით, კონსენსუსის მიღწევა მთავრობასთან ერთთვიანი კონსულტაციის შედეგია.
საკომიტეტო განხილვას თამბაქოს ინდუსტრიის წარმომადგენლებიც დაესწრნენ, ისინი სხვა მოთხოვნებთან ერთად, პროდუქციის ხილულად განთავსების აკრძალვას და კოლოფებზე პიქტოგრამების დიდ ფართობზე განთავსებას აპროტესტებენ.
უმრავლესობას კანონპროექტში შესული ცვლილებების გამო აკრიტიკებს ოპოზიცია. საპარლამენტო უმცირესობის წევრები აცხადებენ რომ მთავრობა დეპუტატებზე ზეწოლას ახდენს.