მიჩვეული ვარ ჩემს მიმართ ცილისწამებებს, - ასე გამოეხმაურა „ევროპული საქართველოს“ ერთ-ერთი ლიდერი ირმა ნადირაშვილი ფოტოგრაფ ირაკლი გედენიძის სასამართლოსთვის მიცემულ ჩვენებას, სადაც ირმა ნადირაშვილიც არის ნახსენები.
როგორც ირმა ნადირაშვილმა საზოგადოებრივს განუცხადა, ირაკლი გედენიძესთან ტელეფონით ბევრჯერ უსაუბრია.
„მიჩვეული ვარ ჩემს მიმართ ცილისწამებებს. ცხადია, ასეთი ტიპის საუბარი არ ყოფილა ჩემსა და ირაკლი გედენიძეს შორის. ასეთი ტიპის სიტყვები საერთოდ არ მჩვევია საუბარში. ჩვენ ბევრჯერ გვისაუბრია, პირადად ტელეფონითაც, მაგრამ მსგავსი რამ არ ყოფილა“, - განაცხადა ირმა ნადირაშვილმა.
ჟურნალისტის კითხვაზე შესაძლებელია, თუ არა რომ გედენიძის ჩვენების გამო, ის პროკურატურაში დაიბარონ, ირმა ნადირაშვილმა აღნიშნა, რომ დაბარების შემთხვევაში უწყებაში მივა.
„პროკურატურაში 100-ჯერ ვარ უკვე დაბარებული, თუ კიდევ ვინმეს ასეთი სურვილი გაუჩნდება 101-დაც მივალ“, - განაცხადა ირმა ნადირაშვილმა.
ირაკლი გედენიძემ სასამართლოსთვის ჩვენების მიცემის დროს განაცხადა, რომ გათავისუფლების შემდეგ, პრეზიდენტის ადმინისტრაციაში, ფოტოგრაფად მუშაობისას დატოვებული ნივთების წამოღება სურდა, რაც გაჭიანურდა და ამის შემდეგ დაუკავშირდა ირმა ნადირაშვილს.
„ირმა ნადირაშვილმა მიპასუხა და ვკითხე, ბოლო- ბოლო მაძლევდნენ თუ არა ჩემს ნივთებს. ნადირაშვილმა ტელეფონში მითხრა, აბა რა გეგონა აქციაზე რომ დაეთრეოდიო", - განაცხადა გედენიძემ.